សេចក្តីប្រកាសព័ត៌មានស្តីពីលទ្ធផលសម័យប្រជុំរដ្ឋសភាលើកទី១ នីតិកាលទី៧ នាថ្ងៃទី២២ ខែសីហា ឆ្នាំ២០២៣
នៅថ្ងៃទី២២ ខែសីហា ឆ្នាំ២០២៣ អគ្គលេខាធិការដ្ឋានរដ្ឋសភាបានចេញសេចក្តីប្រកាសព័ត៌មានស្តីពីលទ្ធផលសម័យប្រជុំរដ្ឋសភាលើកទី១ នីតិកាលទី៧ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភា និងជាប្រធានបណ្តោះអាសន្ន ដោយមានវត្តមានតំណាងរាស្ត្រ នីតិកាលទី៧ នៃរដ្ឋសភាចំនួន ១២៣រូប។ របៀបវារៈនៃសម័យប្រជុំរដ្ឋសភានេះ គឺការបោះឆ្នោតជាកញ្ចប់ ដើម្បីជ្រើសតាំងប្រធាន អនុប្រធាន រដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា និងផ្តល់សេចក្តីទុកចិត្តចំពោះរាជរដ្ឋាភិបាល។ យោងតាមច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ អង្គរដ្ឋសភាបានបោះឆ្នោតអនុម័តដោយលើកដៃចំពោះ បញ្ជីរាយនាមសមាសភាពជាកញ្ចប់ ដោយទទួលបានសំឡេងយល់ព្រមចំនួន ១២៣សំឡេង នៃសមាជិកទាំងមូល។
ព្រឹទ្ធសមាជិករដ្ឋសភា សម្តេចអគ្គមហាពញាចក្រី ហេង សំរិន បានប្រកាសថា សមាសភាពប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា ព្រមទាំងនាយករដ្ឋមន្ត្រី និងសមាជិកទាំងអស់ នៃរាជរដ្ឋាភិបាល នៃព្រះរាជាណាចក្រកម្ពុជា សម្រាប់នីតិកាលទី៧ នៃរដ្ឋសភា ដែលត្រូវបានអង្គសភាបោះឆ្នោតជាប់។
អគ្គលេខាធិការដ្ឋានរដ្ឋសភា
